ប្រែសម្រួល៖រតនា

ញូវដេលី៖ លោកនាយករដ្ឋមន្ត្រីឥណ្ឌា Narendra Modi កំពុងរៀបចំការកាត់បន្ថយពន្ធគយបន្ថែមទៀត មុនពេលជំនួបជាមួយប្រធានាធិបតីអាមេរិក Donald Trump ដែលអាចជំរុញការនាំចេញរបស់អាមេរិកទៅកាន់ឥណ្ឌា និងជៀសវាងសង្គ្រាមពាណិជ្ជកម្មដែលអាចកើតមាន នេះបើយោងតាមមន្ត្រីរដ្ឋាភិបាល។

ដំណើរទស្សនកិច្ចរបស់លោក Modi ទៅកាន់សហរដ្ឋអាមេរិកនៅថ្ងៃពុធ (ថ្ងៃទី១២ កុម្ភៈ) និងថ្ងៃព្រហស្បតិ៍ គឺកើតឡើងខណៈពេលដែលលោក Trump គ្រោងនឹងប្រកាសពន្ធគយទៅវិញទៅមកលើប្រទេសជាច្រើន ដែលជាជំហានមួយក្នុងគោលបំណងកែប្រែទំនាក់ទំនងពាណិជ្ជកម្មសកលឱ្យទៅជាអំណោយផលដល់សហរដ្ឋអាមេរិក។

លោក Trump មិនបានបញ្ជាក់ច្បាស់ថាប្រទេសណាខ្លះនឹងរងផលប៉ះពាល់នោះទេ ប៉ុន្តែកាលពីមុនលោកធ្លាប់ហៅឥណ្ឌាថាជា “អ្នករំលោភបំពានយ៉ាងធំ” នៃពាណិជ្ជកម្ម និងបានសង្កត់ធ្ងន់ថា ឥណ្ឌាគួរតែទិញឧបករណ៍សន្តិសុខផលិតនៅអាមេរិកឱ្យបានច្រើនជាងមុន ដើម្បីឈានទៅរកទំនាក់ទំនងពាណិជ្ជកម្មទ្វេភាគីដែលយុត្តិធម៌។

ឥណ្ឌាកំពុងពិចារណាការកាត់បន្ថយពន្ធគយក្នុងវិស័យយ៉ាងហោចណាស់មួយដប់ពីរ រួមមានឧបករណ៍អេឡិចត្រូនិក ឧបករណ៍ពេទ្យ និងវះកាត់ ព្រមទាំងគីមីមួយចំនួន ដើម្បីបង្កើនការនាំចេញរបស់សហរដ្ឋអាមេរិក។ ការកាត់បន្ថយទាំងនេះស្របទៅនឹងផែនការផលិតក្នុងស្រុករបស់ញូវដេលី នេះបើយោងតាមមន្ត្រីរដ្ឋាភិបាលបីរូប។

មន្ត្រីទាំងនោះ ដែលបាននិយាយដោយសុំមិនបញ្ចេញឈ្មោះ បានឱ្យដឹងថា សម្បទានកំពុងត្រូវបានពិចារណាសម្រាប់ទំនិញដែលឥណ្ឌាទិញភាគច្រើនពីសហរដ្ឋអាមេរិក ឬមានសក្តានុពលក្នុងការទិញបន្ថែម ដូចជាអង់តែនចានផ្កាយរណប និងមេសៅឈើ។ លោក Modi រំពឹងថានឹងពិភាក្សាអំពីពន្ធគយជាមួយលោក Trump នៅសប្តាហ៍ក្រោយ ហើយឥណ្ឌាបើកចំហក្នុងការពិភាក្សាអំពីកិច្ចព្រមព្រៀងពាណិជ្ជកម្មតូចមួយដែលអាចកើតមាន។

ការទស្សនកិច្ចមុនពេលកំណត់នេះ សង្ឃឹមថានឹងជៀសវាង “ស្ថានភាពដូចសង្គ្រាមពាណិជ្ជកម្មដែលកំពុងកើតមានរវាងសហរដ្ឋអាមេរិក និងចិន” នេះបើយោងតាមមន្ត្រីទាំងបីរូប។ លោក Trump បានដាក់ពន្ធគយទូលំទូលាយ ១០ ភាគរយលើការនាំចូលពីចិន ដែលធ្វើឱ្យប៉េកាំងឆ្លើយតបដោយដាក់ពន្ធលើថាមពលអាមេរិក។

មន្ត្រីទាំងនោះមិនចង់បញ្ចេញអត្តសញ្ញាណទេ ដោយសារពួកគេមិនមានសិទ្ធិអនុញ្ញាតឱ្យនិយាយជាមួយប្រព័ន្ធផ្សព្វផ្សាយ។ ក្រសួងពាណិជ្ជកម្មឥណ្ឌា ក្រសួងការបរទេស និងការិយាល័យនាយករដ្ឋមន្ត្រី មិនបានឆ្លើយតបនឹងសំណើសុំការអត្ថាធិប្បាយដែលបានផ្ញើតាមអ៊ីមែលក្រៅម៉ោងធ្វើការផ្លូវការទេ។

ការពិភាក្សាអំពីសម្បទានពន្ធគយនេះ កើតឡើងបន្ទាប់ពីការកាត់បន្ថយអត្រាពន្ធគយនាំចូលជាមធ្យមរបស់ឥណ្ឌាមកនៅត្រឹម ១១ ភាគរយ ពី ១៣ ភាគរយ លើទំនិញជាច្រើនមុខក្នុងថវិកាប្រចាំឆ្នាំរបស់ប្រទេស និងការកាត់បន្ថយពន្ធលើម៉ូតូប្រណីត និងរថយន្តប្រណីត។

ឥណ្ឌាក៏កំពុងពិនិត្យឡើងវិញនូវពន្ធបន្ថែមដែលបានដាក់លើទំនិញជាង ៣០ មុខ រួមទាំងរថយន្តប្រណីត និងកោសិកាថាមពលព្រះអាទិត្យផងដែរ។

ជំនួបរវាងលោក Modi និងលោក Trump ខាងមុខនេះ នឹងផ្តោតលើពាណិជ្ជកម្ម កិច្ចសហប្រតិបត្តិការការពារជាតិ និងបច្ចេកវិទ្យា ប៉ុន្តែត្រូវបានប្រឡាក់ដោយការនិរទេសជនជាតិឥណ្ឌាពីសហរដ្ឋអាមេរិកនាពេលថ្មីៗនេះ។

មន្ត្រីម្នាក់ក្នុងចំណោមមន្ត្រីទាំងបីរូបបាននិយាយថា ជំនួបនេះនឹងជួយផ្តល់ទិសដៅនយោបាយដល់ទំនាក់ទំនងរវាងប្រទេសទាំងពីរ ហើយការពិភាក្សាលម្អិតអំពីពន្ធគយនឹងធ្វើឡើងបន្ទាប់ពីដំណើរទស្សនកិច្ចនេះ។

ទោះបីជាលោក Trump រិះគន់ការអនុវត្តពាណិជ្ជកម្មរបស់ឥណ្ឌាក៏ដោយ ប្រធានាធិបតីអាមេរិកបានហៅលោក Modi ថា “អស្ចារ្យណាស់”។

សហរដ្ឋអាមេរិកគឺជាដៃគូពាណិជ្ជកម្មធំបំផុតរបស់ឥណ្ឌា ហើយពាណិជ្ជកម្មទ្វេភាគីបានកើនលើស ១១៨ ប៊ីលានដុល្លារអាមេរិកក្នុងឆ្នាំ ២០២៣-២០២៤ ដោយឥណ្ឌាមានអតិរេកពាណិជ្ជកម្ម ៣២ ប៊ីលានដុល្លារអាមេរិក។

ទំនាក់ទំនងពាណិជ្ជកម្មរវាងប្រទេសទាំងពីរបានរីកចម្រើនយ៉ាងស្ថិតស្ថេរក្នុងទសវត្សរ៍ចុងក្រោយនេះ ដោយវ៉ាស៊ីនតោនកាន់តែមើលឃើញញូវដេលីថាជាកម្លាំងតុល្យភាពទល់នឹងឥទ្ធិពលតំបន់ដែលកំពុងកើនឡើងរបស់ចិន៕

ប្រភព៖ Reuters/lh